عشان ثقتك تهمنا
في سدرة، إحنا بنصنع كل قطعة بكل حُب وعناية في مصانعنا، وعشان كدا بنضمنلك إن اللي بتشوفيه في الصور هو نفس اللي هيوصلك، ويمكن أحلى كمان على الطبيعة! وعشان تكوني مطمنة وتجربتك معانا مريحة، دي كل تفاصيل الاستلام والاسترجاع:
حق المعاينة بالكامل
من حقك طبعاً المعاينة الكاملة للمنتج. مسموح تفتحي الأوردر والمندوب واقف معاكي، وتتأكدي بنفسك من جودة الخامات، التقفيل، ومطابقة الألوان للصور. إحنا واثقين في جودتنا وعايزينك تستلمي وأنتي مطمنة ومبسوطة.
طب وبالنسبة للقياس؟
القياس بشكل عام خارج نطاق المعاينة؛ سياسة شركات الشحن بتمنع القياس لضمان وقت التوصيل للمندوب. ورغم إن فيه بعض المناديب بتوافق بشكل وِدّي، لكن دي حاجة مقدرش نضمنها لك كقاعدة. وعشان كدا وفرنالك جدول مقاسات بالسم دقيق جداً، بتقدري تقيسي عليه أي قطعة مظبوطة عندك عشان تختاري مقاسك وإنتي متأكدة.
لو غيرتي رأيك بعد ما استلمتي؟
عشان تاخدي وقتك وتقيسي براحتك قدام مرايتك؛ لو استلمتي والمندوب مشي ولقيتي الطقم مش مناسب عليكي، متاح تكلمينا في نفس اليوم فقط نعملك طلب استرجاع أو استبدال. دا بيكون "طلب جديد" لشركة الشحن، والمندوب بييجي تاني يوم ياخد القطعة (ودا بيكون بتكلفة شحن إضافية غير الشحن الأول).
تجزئة الأوردر مش متاحة
نعتذرلك جداً، بس مش متاح "تجزئة الطلب" تحت أي ظرف (يعني تستلمي قطعة وترجعي التانية للمندوب وقتها). سياسة شركة الشحن بتفرض استلام الأوردر كامل أو رفضه كامل، والمندوب هيرفض تجزئة الأوردر لأن دي قوانين شركته.
نظام الديبوزت (تأكيد الأوردر)
لو طالبة قطعة واحدة، مفيش أي ديبوزت مسبق، بنأكد معاكي الأوردر وبيتشحنلك علطول. لكن لو الأوردر أكتر من قطعة، بنطلب ديبوزت بسيط (قيمته بتكون نفس قيمة الشحن لمحافظتك) لتأكيد جدية الطلب، وطبعاً المبلغ دا بيتخصم من الإجمالي وقت الاستلام.